BERRIAK

edición 2018

Go Mobility by MUBIL merkaturatzen ari da eta 30 erakusmahai ditu baieztatuta

September 24, 2021
2022 edizioa

Azokako Batzorde Teknikoa Ficoban bildu da gaur goizean
Go Mobility by MUBIL martxoaren 2an eta 3an egingo da Ficoban, Irunen, “Mugikortasun iraunkorraren oraina eta etorkizuna” lelopean

Gaur goizean, Go Mobility by MUBIL 2022ren Batzorde Teknikoaren lehen bilera egin da Ficoban. Bilera horretan, azokaren merkaturatzearen bilakaeraren berri eman da, eta ekitaldiaren antolaketari buruzko hainbat alderdi jorratu dira. Gaur egun, 30 erakuslek baieztatu dute Europako hegoaldean erreferente den industria erakusketa honetan parte hartuko dutela.

Parte hartzen duten enpresak mugikortasun berriaren balio katearen hainbat esparrutakoak dira, baina energia kargatzeko eta biltegiratzeko konpainiak daudela nabarmendu behar da, baita bateriak ekonomia zirkularreko irizpideekin berrerabiltzekoak ere. Arlo hori erronka handia da sektorearentzat.

Go Mobility by MUBIL batzorde teknikoa Ane Insausti MUBILeko zuzendariak zuzendu du, eta erakunde publikoetako, enpresetako, teknologia zentroetako eta mugikortasun iraunkorrarekin eta energiarekin lotutako elkarteetako ordezkariek osatzen dute.

Batzordea aberastu egin da azokaren hirugarren ediziorako, eta lau kide berri ditu.

Alde batetik, BRTA-Basque Research and Technology Aliance, Zientzia, Teknologia eta Berrikuntzaren Euskal Sareko 16 zentro teknologiko eta ikerketa zentro kooperatibo biltzen dituena.

Bestalde, EIT Innoenergy, Europar Batasuneko erakundea, trantsizio energetikoaren erdigunean diharduena, akordio berdea eta Europaren deskarbonizazio helburuak babesteko teknologia eta gaitasunak emanez.

Indar,Grupo Ingeteam, enpresak ere bat egin du azokako Batzorde Teknikoarekin, makina elektriko birakarien (sorgailuak, motorrak eta urpeko ponpak) diseinuan eta fabrikazioan liderra baita.

Azkenik, Petronorrek Go Mobility by MUBIL Batzorde Teknikoarekin ere bat egin du ere. Petronor Estatuko fintze sektoreko liderra da, eta garapen teknologikoan apustu argia egin du deskarbonizazioaren eta jasangarritasun energetikoaren alde.

Go Mobility by MUBIL azokak hirugarren edizioa ospatuko du, “Mugikortasun iraunkorraren oraina eta etorkizuna” lelopean, 2022ko martxoaren 2an eta 3an, Irungo Ficoba azoka barrutian. MUBIL Fundazioak sustatutako industria erakusketa hau Gipuzkoako Foru Aldundiaren Etorkizuna Eraikiz esparruaren barruan sortu da, eta Ficobarekin elkarlanean antolatu da. Foru erakundearen beraren eta Eusko Jaurlaritzaren babesa du, eta mugikortasun berriaren balio kateko eragile guztiak biltzen ditu, merkatuko irtenbide teknologiko aurreratuenak erakusten baidira hitzordu honetan.

Mugikortasunaren eraldaketa kontzeptu berri batean islatu da, eta kontzeptu horrek ez du iraunkortasuna soilik azpimarratzen; aitzitik, mugikortasuna funtsezko lau ezaugarrik definitzen duten jarduera gisa ikusten du: garbia, konektatua, segurua eta eskuragarria.

Lau premisa horiek kontuan hartuta, Go Mobility by MUBIL hirugarren edizioak merkatuaren azken berrikuntzak erakutsiko ditu, ikuspegi industrial eta digital bikoitzetik, eta Europa hegoaldean erreferentziazko hitzordua izaten jarraitzeko helburuarekin egingo du, oraingo eta etorkizuneko mugikortasun jasangarriaren ekosistemako eragile guztientzat. Era berean, balio erantsi handiko trukeak sustatzeko, proiektu berritzaileak bultzatzeko eta lurraldearen eraldaketa industriala bultzatzeko topagune bihurtu da dagoeneko ekitaldia.

Go Mobility by Mubil-eko Batzorde Teknikoko kideak